Mila manana fahasahiana isika hanova ny tantaran’ny aty Atsimo. 80 taona mahery izao no niaretan’ireo mponina aty ny mosary, ny haintany, ny fahantrana. Fotoana izao hametrahana tetik’asa maharitra ahitam-bokany haingana. Fotoana hametrahana vina mazava sy tetik’ady maty paika hanatanterahana izany. Tsy hionona amin’ny fanampiana mandalo intsony ny ady amin’ny tsy fanjarian-tsakafo. Vahaolana maharitra dia ny fanajariana ny tany ahatrarana ny fizakan-tena ara-tsakafo, ny fametrahana indostria hanodinana ireo vokatra, ny fanamboaran-dalana indrindra ny rn13 sy rn10, ny fifehezana ny rano ary ny famoronana asa no entina hanavotana an’Androy sy Anosy. Tsy hanome trondro fotsiny isika fa hanome harato; miara-mientana anatin’izao fikaonandoha goavana eto Tolagnaro izao. Isika samy malagasy ihany no afaka hamadika ny pejy, hitondra fampandrosoana aty atsimo.